Musavat.az
Musavat.az




Müsavat » Xeberler» Xeber

“Torpaqlar alınsa, gedib oğlumun qanı axan o torpağı öpecem” – Şehid esgerin anası

16 Ekim 2016

6:44 pm


16/10/2016 [22:43]: xeber –
Aprel döyüşlərində qəhrəmancasına həlak olan igidlərimizdən biri də şəhid əsgər Əbdülməcid Nadirşah oğlu Axundovdu.Biz sayt olaraq torpaqlarımızın azadlığı uğrunda şirin canından keçən bütün şəhidlərimizin ruhunun qismən də olsa rahatlıq tapması üçün hər dəfə bir şəhid qapısını döyürük. Bu dəfə şəhid Əbdülməcidin döyüş yolunu varaqlamaq üçün şəhidin doğulub boya – başa çatdığı Sumqayıt şəhərinə yola düşdük. Bizi şəhidimizin anası Ceyran xanım, qardaşı Elçin və əmisi qızı İlhamə xanım qarşıladı. Söhbətimizə şəhidimizin anası Ceyran xanımla başladıq:Anası Ceyran xanım:“O, istədi ki, zabit olsun, amma mən razı olmadım…”“Əbdülməcid uşaqlıqdan özünü heç nədə tapa bilmirdi. Bir müddət futbola getdi, sonra futboldan ayrıldı. Bir müddət idmanın güləş növü ilə məşğul oldu. Sonra o idman növündən də ayrıldı. Bizdə bir uşaq mərkəzi açılmışdı Əbdülməcidi ora apardım. Əbdülməciddə çox böyük yumor hissi var idi, çoxlu məzəli əhvalatlar danışırdı. Həmin mərkəzdə Əbdülməcid də elə ilk müsabiqədən uğurla keçərək qəbul olundu. Ordan da ayrıldı və onu bu dəfə musiqiyə yönəltdim. Onu “Sintizator” kursuna yazdırdım. Üç il oxudu və ifa da edirdi. Nəsə get – gedə hiss etdim ki, bu uşaqda ancaq hərbiyə həvəs var. O, istədi ki, zabit olsun, amma mən razı olmadım. Dedim iki oğlum var, qoy gözlərimin qarşısında olsunlar. Hərbiçi həyatı çox çətindi.“Əbdülməcid şəhid olanda üç ayı qalmışdı ki…”2010 – cu ildə Sumqayıt şəhərindəki 16 – saylı orta məktəbi bitirdikdən sonra sənədlərini birinci qrupa verdi. Birinci il imtahandan kəsildi, on altı balı çatmamışdı. İkinci il Əbdülməcid yenidən hazırlaşdı və Texniki Universitetin Energetika fakulitəsinə qəbul olundu. Ali təhsilini çox yaxşı başa vurdu. 2015 – ci ilin iyul ayında Əbdülməcid hərbi xidmətə yollandı. Ali təhsilli olduğu üçün bir il xidmət etməli idi. Gənc əsgər kimi üç ay Gəncə şəhərində xidmət etdi. Üç aydan sonra Tərtər rayonuna yollandı. Gəncədə xidmət edəndə and içmə mərasimində yanına getmişdik. Tərtərdə olanda isə qardaşı və atası yanına gedirdi. Mənə deyirdi ki, sən gəlmə bura. Amma, indi fikirləşirəm ki, gərək gedərdim. Əbdülməcid şəhid olanda üç ayı qalmışdı ki, hərbi xidmətini başa vursun.“Bir də aprelin 1 – də zəng vurub qardaşının doğum günün təbrik etdi…”Yanvar ayında özü məzuniyyətə gəlmişdi. Qapını açanda tanımadım. O qədər böyümüşdü. Hərbi forması da ona çox qəşəng yaraşırdı. Məzuniyyətdən gedəndən sonra həmişə telofonla danışırdıq. Bir dəfə mart ayının 21 – də danışdıq. Bir də aprelin 1 – də zəng vurub qardaşının doğum günün təbrik etdi və bir az da mənimlə danışdı. Aprelin 1 – də zəng vuranda elə tələm – tələsik danışdı. Dedi ki, arxayın ol hər şey yaxşıdı. Mən də dedim ki, oğlum, mən sənə diplomunun sürətini göndərmişəm. Dedi ki, nə vaxt göndərmisən? Dedim ki, martın 16 – da yola saldım. Dedi ki, yaxşı deyərəm uşaqlar gedib götürərlər.“Həmişə deyirdi ki, mənim doğum günümə niyə heç kim gəlmir…”Əbdülməcid Aprelin 1 – dən 2 – nə keçən gecə şəhid olub. Onlar Seysulan kəndində şəhid olublar. Aprelin 2 – dən Əbdülməcidlə əlaqə olmadı. Nə gecəmiz var idi, nə də gündüzümüz. Ancaq televizora baxırdıq ki, nəsə məlumat alaq. Aprelin 8 – də meyidlər qarşı tərəf ilə dəyişdiriləndə Əbdülməcidin də meyidini qaytardılar. Mən hələ də elə bilirdim ki, sağdı. Aprelin 8 – də atası da Tərtərə yola düşdü. Həmin gün atası orda Əbdülməcidin üzünü görüb tanıyıb. Atasını Sumqayıta yola salandan sonra, aprelin 9 – də Əbdülməcidin cənazəsini gətirdilər. Oktyabrın 15 – də 23 yaşı tamam oldu. (Ağlayır)Həmişə deyirdi ki, mənim doğum günümə niyə heç kim gəlmir. Mən də zəng vurub qohum – əqrabaya deyirdim ki, Əbdülməcidin doğum günün niyyə təbrik etmirsiniz? Hamınızdan küsüb. Amma, dünən onun doğum günündə böyük izdiham var idi.“Torpaqlar alınsa, gedib oğlumun qanı axan o torpağı öpəcəm…”Aprel şəhidləri bir ad qoydular. Mənim heç kimdən başqa bir təmənnam yoxdu. Bircə istəyim şəhidlərimizin adının yaşadılmasıdı. Torpaqlar alınsa, gedib oğlumun qanı axan o torpağı öpəcəm. Niyə ağlamalıyam ki… Alınmasa, çox heyf deyəcəm. Deyəcəm ki, alınmaz olan o torpaqlara görə bizim övladlarımız şəhid oldu. Onların hər birinə Milli Qəhrəman adı verilməli idi. Mən bunu təkcə öz oğlum üçün demirəm. Mən bütün şəhid analarının adından bunu deyirəm. Əbdülməcidə Milli Qəhrəman adı verilsəydi, bu gün onun adını oxuduğu məktəbə çox asanlıqla vermək olardı. Küçə adının verilməsi ilə bağlı Sumqayıt şəhər İcra Hakimiyyətinə müraciət etmişəm və ümid edirəm ki, küçə adı veriləcək”.Qardaşı Elçin:“Mənə dedi ki, sənə xoşbəxtlik arzulayıram…”“Əbdülməcid ilə uşaqlığımız bir yerdə keçib. Mən Neft Akademiysının üçüncü kursunda oxuyanda, o, da Texniki Universitetə qəbul olundu. Bir sözlə hərəmizin öz ətrafımız var idi. Amma, qardaş başqa şeydi. İndi hiss edirəm ki, Əbdülməcidsiz necə təkəm. (Gözləri dolur) Aprelin 1 – i Əbdülməcid zəng vurub doğum günümü təbrik etdi. Özümə də çox xoş oldu. Dedim ki, qardaşım hərbi xidmətdə ola – ola doğum günümü yaddan çıxarmayıb. Mənə dedi ki, sənə xoşbəxtlik arzulayıram. Əbdülməciddən aprelin 2 – də xəbər olmayanda iki dostumu da götürüb aprelin 6 – da Tərtərə yola düşdük. Orda bizə bildirdilər ki, onlar itkin düşüblər. Mənə qardaşımın şəxsi əşyalarını da verdilər. Mənə deyilən itkin xəbərini və şəxsi əşyalarını anamdan gizlətdim. Bu yaxınlarda anam bildi ki, mənə onun itkin xəbərini deyib, şəxsi əşyalarını veriblər”.Söhbətimizə şəhidimizin əmisi qızı İlhamə xanım da qoşulur. Əbdülməcid haqqında bir əmi qızı kimi çox xoş fikirlər söyləyir:Əmisi qızı İlhamə xanım:“Əbdülməcid haqqında danışmaq mənim üçün çox xoşdu. Əvvəl gec – gec görsəm də, sonra Əbdülməcid bizə bacımın yanına hazırlığa gələndə həftədə iki dəfə görüşürdük. Çox şən, zarafatçıl bir uşaq idi. Sosial şəbəkədə dosluğumda da var idi, həmişə statuslarına birinci şərhi mən yazırdım. Onunla bağlı bilmirəm nə danışım. Karaktercə çox xoş bir uşaq idi. Amma, indi onu xatırladıqca içimiz acıyır. (Gözləri dolur)Sonda şəhidimizin ailəsinə başsağlığı verib oradan ayrılırıq. Allah bütün şəhidlərimizə rəhmət eləsin.Qeyd edək ki, bizdə sayt olaraq dünən şəhidimizin Əbdülməcid Axundovun doğum gününə həsr edilmiş anım tədbirində iştirak etdik .  Tədbirdə Sumqayıtın dövlət  və qeyri-dövlət qurumlarının nümayəndələri, millət vəkilləri, icra hakimiyyətinin məsul işçiləri, şəhidin anası Ceyran Axundovanın çalışdığı Mədəniyyət və Turizm idarəsinin kollektivi, Əbdülməcidin təhsil aldığı məktəbin müəllimləri, sinif və tələbə yoldaşları, dostları, qohumları, Sumqayıt sakinləri, Azərbaycanın müxtəlif bölgələrdən gəlmiş qonaqlar iştirak etdi. Qonaqlar arasında həmçinin Əbdülməcid Axunodovla bərabər şəhid olmuş Elvin Mirzəyevin, Mahir Mirzəyevin, Sultan Bayramovun, Müşfiq Orucovun, Şulan  Bayramov, Seymur Baxışovun valideynləri də iştirak etdilər .Vasif Əlihüseyn


mənbə : moderator.az



Şərh yazılmayıb.

Şərh yaz.








           
MARAQLI
Maraqlı
- Sitemap - musavat son xeberler Son Xeberler - Son Xəbərlər, yeni musavat, müsavat, musavat qezeti xeberler