Musavat.az
Musavat.az




Müsavat » Xeberler» Xeber

Ömürlük mehbuslara merhemet istenildi

09 Eylül 2016

4:24 pm


09/09/2016 [20:23]: xeber –
sayt xəbər verir
ki ,Qarabağ Azadlıq Təşkilatı və Ömürlük Məhbusların Hüquqlarını Müdafiə Komitəsinin
təşəbbüsü ilə “Ömürlük həbs cəzası və insan haqları” mövzusunda Dəyirmi Masa
keçirilib. QAT sədri, Müdafiə Komitəsinin rəhbəri Akif Nağı giriş sözü ilə
çıxış edərək, məqsədləri ilə bağlı məlumat verib.

Tədbirdə hüquq müdafiəçiləri,
hüquqşünaslar, QHT təmsilçiləri, ömürlük məhbusların yaxınlarından Elçin Qəmbərov,
Müslimat Rzaxanova, Nəsimi İsayev, Rövşən Əhmədli, Mətləb Mütəllili və digərləri
çıxış edərək bildiriblər ki, tədbirin keçirilməsində məqsəd dövlət rəhbərliyinin
və cəmiyyətin diqqətini ömürlük məhbuslara cəlb etməkdir. Bu məhbus təbəqəsi tamamilə
unudulmuş, diqqətdən kənarda qalmışdır, əfv və ya amnistiya aktlarında onlar nəzərə
alınmır. Bu insanların bir hissəsi Qarabağ müharibəsində vuruşub, həbsdəkilərin
çoxu Qarabağda müharibə başlayarsa, getməyə hazır olduqlarını bildiriblər. Ən
vacib məsələ ömürlük həbs cəzasının müddətli həbs cəzası, məsələn, 15-20 illik
həbs cəzası ilə əvəz olunmasıdır. Bəzi qatı cinayətkarlar istisna olmaqla
ömürlük məhbusların xeyli hissəsinin cəzasını müddətli həbs cəzası ilə əvəz etmək
olar. Bu, çox humanist bir addım olardı. Ötən əsrin 90-cı illərində güllələnmə
hökmü almış şəxslərin cəzalarının ömürlük həbs cəzası ilə əvəzlənməsi ciddi
mübahisələr doğurub. Həmin vaxt mərhum prezident Heydər Əliyev ömürlük deyil,
uzunmüddətli həbs cəzası təklif etmişdi. Həmin dövrdə Azərbaycanda ən uzunmüddətli
cəza 15 il idi. Amma nə üçünsə Milli Məclis o vaxt yanlış bir qərar qəbul etdi.
Bu qərarın dəyişdirilməsinə ehtiyac var. Dəyirmi Masada o da diqqətə çatdırılır
ki, bəzi ömürlük məhbuslar artıq 25 ildən çoxdur ki, həbsdədirlər, xəstədirlər.
Qanuna görə, 25 ildən sonar onların işinə yenidən baxılmalı, azadlığa
buraxılmalıdırlar. Amma hər dəfə onların işinə formal baxılır, hökm qüvvədə
saxlanılır. Onların azadlığa buraxılması humanist və savab bir iş olardı.

Dəyirmi Masa iştirakçıları
qoyulan məsələlərlə bağlı prezident İlham Əliyevə müraciət göndəriblər. Müraciətdə
göstərilir:  Hörmətli cənab Prezident.

Ömürlük həbs cəzası almış
məhbusların acı taleyi ilə bağlı Sizə müraciət edirik. Bu məsələyə Sizin diqqət
yetirməyinizə çox böyük ehtiyac vardır. Burada toplanmış çoxsaylı problemlər
yalnız Sizin müdaxilənizlə öz həllini tapa bilər. Xeyli sayda ömürlük həbs cəzası
almış insan, onların yaxınları yalnız Sizin humanizminizə, insanpərvərliyinizə,
ədalətinizə ümid edirlər.

  Bu problemlərin həlli cəmiyyətimizin də
sağlamlaşmasına, dövlətimizə inamın güclənməsinə müsbət təsir göstərər. Sağlam
cəmiyyət və güclü dövlət Azərbaycanın əsas dərdi, problemi olan Qarabağ münaqişəsinin
həllində həlledici rol oynayaraq, Sizin siyasi iradənizin əsas təminatçısına
çevriləcəkdir. Onu da qeyd etməliyik ki, ömürlük məhbusların bir hissəsi
Qarabağ müharibəsində fəal iştirak etmiş adamlardır.Biz problemlərimizin xaricdən
kimlərinsə, hansısa təşkilatların həll etməsinin tərəfdarı deyilik. Biz millət
və dövlət olaraq öz problemlərimizi özümüz həll etməliyik, ölkəmizdə öz milli
xüsusiyyətlərimizə uyğun haqq-ədalət sisteminin bərqərar olmasına özümüz nail
olmalıyıq. Ona görə də biz xarici təşkilatlara deyil, məhz Sizə müraciət
edirik. Siz ölkədə mühüm islahatların həyata keçirilməsinə rəhbərlik edir,
prosesləri bacarıqla nəzarətdə saxlayır, lazımi istiqamətlərə yönəldirsiniz.
Sizin dəfələrlə vurğuladığınız kimi, bu proseslərin daha səmərəli olması üçün
ictimai nəzarətin təşkili, mövcud problemlərin ictimailəşdirilməsi  və dövlət orqanlarının diqqətinin bu məsələlərə
cəlb olunması mühüm əhəmiyyətə malikdir. Biz də bu tezisdən çıxış edərək
ömürlük məhbuslarla bağlı problemləri ictimailəşdirməyi, Sizin diqqətinizə
çatdırmağı özümüzə bir vətəndaş kimi borc bilirik.  Bu problemlərin aradan qaldırılması haqq-ədalətin
bərpasına və bununla da dövlətimizin güclənməsinə xidmət edəcəkdir.

 Ömürlük məhbuslarla bağlı problemlərin kökündə
bu cəza növünün ciddi əsas olmadan tez-tez verilməsi, çox vaxt cəzanın törədilmiş
cinayətə adevkat olmaması, ömürlük həbs cəzasının müddətli həbs cəzası ilə əvəzlənməsinə
ciddi sosial sifarişin yaranması, bir çox məhbsuların artıq uzun müddət həbsdə
olması, sağlamlıqlarını tamamilə itirməsi və sair məsələlər dayanır.

Bu problemlərin ən əsaslarını
ümumiləşdirilərək Sizin diqqətinizə çatdırmağı özümüzə borc bilirik:

1.Ömürlük həbs cəzasının müddətli həbs cəzası ilə əvəz
olunması bu gün mədəni ölkələrdə ciddi müzakirə olunur və bu və ya digər
formada öz müsbət həllini tapır. Azadlıqdan məhrum edilmiş məhbsuların böyük əksəriyyəti
10-15 ildən sonra islah olur. Ona görə də biz ömürlük həbs cəzasının 15-20
illik müddətli həbs cəzası ilə əvəz olunmasını xahiş edirik.

2.Ötən əsrin 90-cı illərinin sonunda güllələnmə hökmü almış məhbusların
cəzalarının ömürlük həbs cəzası ilə əvəz olunması ilə bağlı məsələni xüsusi
vurğulmaq istəyirik. Həmin vaxt bu məsələ beynəlxalq təşkilatların diqqət mərkəzində
idi. Azərbaycan rəhbərliyi bu məsələyə xüsusi önəm verirdi. Məhz bu diqqətin nəticəsi
idi ki, Azərbaycanın mərhum prezidenti Heydər Əliyev 22 yanvar 1998-ci ildə bu
məsələyə dair xüsusi bəyanatla çıxış etdi və belə bir fikri xüsusi olaraq
vurğuladı: “Mən bu məsələləri ətraflı təhlil edəndən sonra belə qərara gəlmişəm
ki, Azərbaycanın cinayət məcəlləsində ölüm hökmü ilə əlaqədar olan  bütün müddəalar dəyişilməlidir və Azərbaycanda
ölüm hökmü bir cəza kimi ləğv olunmalıdır. Ölüm hökmünə məhkum olunmuş
insanların cəzası müvafiq qaydada uzunmüddətli cəzalarla əvəz edilə bilər”.
(“Azərbaycan” qəzeti”, 23 yanvar 1998-ci il). Qeyd edək ki, həmin dövrdə Azərbaycanın
cinayət məcəlləsində ən uzunmüddətli həbs cəzası 15 il idi. Həmin dövrdə Milli
Məclisin rəhbərliyi, digər rəsmi şəxslər, ekspertlər ölüm hökmünün 15 il həbs cəzası
ilə əvəzlənməsinə dair fikirlər səsləndirirdi. Amma nə üçünsə heç kəsin gözləmədiyi
halda Milli Məclisin 2 fevral 1998-ci il tarixli qərarı ilə güllələnmə hökmü
verilmiş şəxslərin hamısının cəzası ömürlük həbs cəzası ilə əvəz olundu. Bu qərarla
Milli Məclis həm prezident Heydər Əliyevin konkret tapşırığını yerinə yetirməmiş
oldu, həm də öz səlahiyyətlərindən kənara çıxdı. Beləki bu cür hüquqi qərarın qəbul
olunması Milli Məclisin səlahiyytələrinə daxil deyil,  bu cür məslələrlə  bağlı qərarları Ali Məhkəmə, ya da
Konstitusiya Məhkəməsi verə bilər. Xahiş edirk ki, bu məsləyə yenidən baxılması
üçün təşəbbüs edəsiniz.

3.Ömürlük məhbusların işləri ilə tanış olduqdan sonra belə qənaətə
gəlmişik ki, bir çox məhbuslara cinayətlərinə uyğun olmayan cəza – ömürlk həbs
cəzası verilib. Bu cəza verilərkən  bəzən
tələskənliyə yol verilib, ətraflı araşdırmalar aparılmayıb, sübutlar kifayət qədər
əsaslandırlmayıb, vəzifəli şəxslərin sifarişləri yerinə yetirilib, subyektiv
amillər üstünlük təşkil edib. Məsələn, bir çox adamlar heç bir konkret sübut
olmadan dövlətə xəyanət maddəsi ilə ittiham olunub, yaxud bir nəfərin ölümünə
görə ömürlük həbs cəzası verilib və yaxud hadisəni törədənlər hələ də
axtarışdadılar, amma hadisənin törədilməsində iştirakçı kimi cəlb olunanlara
ömürlük cəza verilib. Hər bu cür işin arxasında insan, ailə, nəsil taleyi
dayanır. Ona görə bu işlərin hər birinin yenidən araşdırılmasına ehtiyac var.
Xahiş edirik ki, bu işlərin hər birinin diqqətlə araşdırılması üçün xüsusi
komissiyanın yaradılmasına göstəriş verəsininz.

4.Ömürlük məhbusların içərisində artıq 25 ildən çox cəza çəkənlər,
ağır xəstəlikdən əziyyət çəkənlər var.  Məhbuslardan
cinayət hadisəsini cavan vaxtı törədib, indi peşiman olanlar da çoxdu. Ömürlük
məhbuslrın bir hissəsi Qarabağ müharibəsində fədakarlıq göstərib, döyüşüb,
yaralanıblar, bir qismi şəhid ailələrinin üzvləridir. Bu qisim adamların əfv
olunması imkanlarını nəzərdən keçirməyinizi xahiş edirik.

İctimai əhəmiyyətli  bu məslələrlə bağlı Sizə müraciət etməyi
özümüzə borc bildik.   Bu insanların
taleyi Sizdən, Sizin mərhəmətinizdən asılıdır. İnanırıq ki, bu dəfə də Sizə
ümid edən, mərhəmətinizə inanan insanları məyus etməyəcək, müraciətimizə diqqətlə
yanaşacaqsınız. Əvvəlcədən təşəkkürümüzü bildiririk.

 


mənbə : moderator.az



Şərh yazılmayıb.

Şərh yaz.








           
MARAQLI
Maraqlı
- Sitemap - musavat son xeberler Son Xeberler - Son Xəbərlər, yeni musavat, müsavat, musavat qezeti xeberler