Musavat.az
Musavat.az




Müsavat » Xeberler» Xeber

Müsteqil Azerbaycanın jurnalisti olmaq daha çetin ve daha şereflidir!

21 Temmuz 2016

2:28 pm


21/07/2016 [18:25]: xeber –
Mən bu yazıma səmimi bir etirafla başlamaq istəyirəm. Orta məktəb illərimdə mən də jurnalist olmaq arzusu ilə yaşayırdım. Düşünürdüm ki, böyüyəndə jurnalist olacağam və tanınmış insanlardan müsahibələr götürəcəyəm, tarixi mövzularda, vətənpərvərlik mövzularında yazılar yazacağam. Ancaq atalar yaxşı deyib ki, sən saydığını say, gör əlahəzrət zaman özü nə sayır. Mənim jurnalist olmaq arzum elə arzu olaraq da qaldı. İş elə gətirdi ki, mən tarixi mövzularda yazan jurnalist yox , tarixçi oldum. Sonralar ikinci təhsil kimi hüquq təhsili də aldım. Və bu ixtisaslar məni jurnalist olmaq arzumdan tamamilə uzaqlaşdırdı. Ancaq hər nə qədər uzaqlaşdırsa da, mənim jurnalistlərə və onların peşəsinə hörmətim, rəğbətim heç vaxt azalmadı. Bu gün də bu rəğbətimi bir daha dilə gətirmək, nümayiş etdirmək üçün fürsət qazandığıma görə özümü xoşbəxt hiss edirəm.Keçdiyim həyat yolu və aldığım tarixçi-hüquqşünas təhsili məntiqi nəticə olaraq məni siyasətə gətirdi. Mən hal-hazırda siyasi fəaliyyətlə məşğulam. Və üzvlərinin sayı etibarilə Azərbaycanın ən böyük siyasi partiyalarından birinə – Demokratik Azərbaycan Dünyası Partiyasına (DADP) rəhbərlik edirəm. Təməli Ulu Öndər Heydər Əliyevin xeyir-duası ilə qoyulmuş bu partiyanın hal-hazırda on minlərlə üzvü var. Bu partiyanın fəaliyyəti məndən əvvəlki sədrlərin dönəmində də, mənim sədrlik etdiyim dövrdə də daim medianın diqqət mərkəzində olub, indi də diqqət mərkəzindədir. Biz ölkə KİV-ləri ilə müntəzəm surətdə əməkdaşlıq edirik. Xəbər saytları fəaliyyətimizi, tədbirlərimizi işıqlandırırlar. Televiziyalar da tədbirlərimizi və fikirlərimizi diqqətdən kənarda qoymurlar. Elə mən özüm də mütəmadi olaraq analitik-informasiya saytlarında ölkədə və dünyada baş verən mühüm hadisələrlə bağlı tez-tez açıqlamalarla çıxış edirəm. Xüsusən də Birinci Qarabağ müharibəsinin iştirakçısı kimi millətimizin Qarabağ dərdi ilə bağlı fikirlərimi media üzərindən vətəndaşlarımızla bölüşürəm.Qeyd etdiyim kimi, bütün bunlar hamısı məhz mətbuatın sayəsində, fədakar jurnalist dostlarımızın sayəsində mümkün olur, gerçəkləşir. Buna görə də, mən onlara sonsuz dərəcədə minnətdaram. 1992-ci ildən üzü buyana, DADP-nin haqqında yazı yazmış, bu partiyanı cəmiyyətə, sıravi seçicilərə müsbət yöndən tanıtmağa çalışmış hər bir qələm adamına ayrıca təşəkkürümü bildirirəm. Və fürsətdən istifadə edib 22 iyul Mətbuat Günü ərəfəsində jurnalistlərlə, bütövlükdə isə mətbuatımızla bağlı bəzi fikirlərimi izhar etmək, bölüşmək istəyirəm.1875-ci ilin bu təqvimində müqtədir ziyalımız, görkəmli maarifpərvərimiz Həsən bəy Zərdabi “Əkinçi”nin nəşrinə başlayarkən dövrün şərtlərinin nə qədər ağır olduğunu hamımız yaxşı bilirik. O böyük insan Azərbaycan mətbuatının təməlini qoyarkən Azərbaycan özü müstəqil deyildi. Ölkəmiz çar Rusiyasının ucqar bir müstəmləkəsi idi. Və gürcülərdən, ermənilərdən fərqli olaraq bizim millətə öz dilimizdə qəzetlər təsis etməyə, məktəblər açmağa imkan verilmirdi. Bu da öz növbəsində ölkədə təhsilli insanların, qəzet və kitab oxumağı bacaran oxucuların sayının minimum səviyyədə qalmasına səbəb olurdu. Bax, məhz belə bir acınacaqlı şəraitdə Həsən bəy öz çiyinlərini olduqca ağır bir yükün altına verdi və ilk baxışdan mümkünsüz kimi görünən bir məsələni gerçəyə çevirdi, milli mətbuatımızı yoxdan var eylədi. Odur ki, biz azərbaycanlılar o böyük Kişinin ruhu qarşısında həmişə minnətdar olmalı və ona qarşı şükranlıq borcumuzu heç vaxt unutmamalıyıq !Həsən bəy Zərdabidən və onun əkinçisi olduğu “Əkinçi”dən sonra Azərbaycan mətbuatı çox uzun və keşməkeşli bir yol keçib. Ancaq 1918/20-ci illəri, yəni Azərbaycan Xalq Cümhuriyyətinin mövcud olduğu 23 aylıq qısa zaman kəsiyini çıxmaq şərti ilə bizim mətbuatımız heç vaxt indiki kimi müstəqil ölkənin müstəqi mətbuatı olmayıb. 70 illik sovet dövrü də Azərbaycan mətbuatının müstəqil olmasına heç bir imkan verməyib.Azərbaycan mətbuatı sözün həqiqi mənasında müstəqilliyi məhz Sovetlər Birliyi dağıldıqdan və müstəqil Azərbaycan Respublikası qurulduqdan sonra əldə etdi. Artıq 25 ildir ki, Azərbaycan mətbuatı müstəqil ölkənin azad mətbuatı kimi, dördüncü hakimiyyəti kimi fəaliyyət göstərir. Bu, çox önəmli bir məsələdir. Və mən hesab edirəm ki, indiki dövrdə jurnalist olmaq daha çətin, daha məsuliyyətli və daha şərəflidir. Çünki indiki jurnalistlərimizin üzərinə sadəcə öz oxucularımız üçün yazmaq, öz tamaşaçılarımız üçün veriliş hazırlamaq vəzifəsi düşmür. Bizim günlərin jurnalistləri həm də Azərbaycanı xaricdə müstəqil dövlətin media nümayəndələri, sözçüləri kimi təmsil etmək görəvini daşıyırlar. Bu isə jurnalistlərimizdən ikiqat, üçqat artıq məsuliyyətli olmağı tələb edir.İndi jurnalist olmaq həm də ona görə məsuliyyətli və şərəflidir ki, çünki bizim Qarabağ kimi böyük bir dərdimiz var. Bədnam Ermənistanın bizə qarşı başlatdığı haqsız savaş hələ bitməyib. Hər bir azərbaycanlı üçün müqəddəs sayılan torpaqlarımızın işğalı hələ də davam edir. Amma bu işğal əbədi davam edə bilməz! Biz gec-tez öz torpaqlarımızı mənfur erməni işğalından azad edəcəyik. Elə 2-5 Aprel Savaşındaki qələbəmiz də bir daha bunu göstərdi ki, Qarabağımızın işğaldan azad ediləcəyi gün çox da uzaqda deyil. Ancaq çoxdandır ki, həsrətində olduğumuz o müqəddəs Qələbənin qazanılması təkcə əsgər və zabitlərimizin şücaətindən asılı deyil. Bu işdə hərbçilərimiz qədər jurnalistlərimizin də üzərinə böyük bir vəzifə düşür.Əsgərimiz silahıyla döyüşürsə, jurnalistlərimiz də öz qələmiylə, sözüylə Qarabağ uğrunda döyüşməli, ermənilərə qarşı ikinci cəbhə açmalıdır. Azərbaycan insanının vətənpərvərlik hisslərinin formalaşmasında jurnalistlərimizin üzərinə nə boyda yük düşürsə, ermənilərə qarşı uğurlu informasiya savaşının aparılmasında da ondan da böyük yük düşür. Və bugünki Azərbaycan jurnalisti bu yükü layiqincə daşımağa hər an hazır olmalıdır. Əlini-qolunu çırmalayıb bu istiqamətdə iş aparmalıdır, qələminə sarılmalıdır. Bu gün mən çox böyük qürur hissi ilə deyə bilərəm ki, bəli, bizim belə jurnalistlərimiz var.Yazımın sonunda isə bir məqama xüsusi olaraq toxunmaq istərdim. Jurnalistlər öz peşələrinin vurğunu olurlar. Söhbət sözün əsl mənasında JURNALİST`lərdən gedir. Və onlar hətta adi vaxtlarda da jurnalist olduqlarını unutmur, özlərini jurnalist adına layiq bir şəkildə aparırlar. Onlarla ünsiyyətdə olanda, söhbət edəndə sən bilirsən ki, həqiqətən də əsl qələm adamıyla, sözün yaradıcılıq enerjisinə sahiblənmiş bir şəxslə, şəxsiyyətlə söhbət edirsən. Bax bu cür kriterlərə söykənən insanları tanımaq və onlarla həmsöhbət olmaq çox maraqlıdır. Mən çox şadam ki, mənim də dostlarımın arasında bu cür insanlar var. Və məhz həmin dostlarımın sayəsində ümumən Azərbaycan jurnalistikasının indisi və gələcəyi haqda pozitiv düşüncələrə köklənmək, bu yazını da müsbət notlarla tamamlamaq olar.Əziz jurnalistlər !Mən öz qələm dostlarımın timsalında sizləri – bütün media camiəsini ürəkdən təbrik edir və hər birinizə Həsən bəy Zərdabi miqyasında uğur arzulayıram.Mətbuat Gününüz mübarək olsun !Əlisahib Hüseynov Demokratik Azərbaycan Dünyası Partiyasının (DADP) sədri




Şərh yazılmayıb.

Şərh yaz.








           
MARAQLI
Maraqlı
- Sitemap - musavat son xeberler Son Xeberler - Son Xəbərlər, yeni musavat, müsavat, musavat qezeti xeberler