Musavat.az
Musavat.az




Müsavat » Xeberler» Xeber

Ayı eti halaldırmı?

02 Kasım 2016

6:36 am


02/11/2016 [10:35]: xeber –
Oktyabrın 29-da Şəki rayonunun Şin kəndində, sərhəd zastavasının xidməti sahəsində Dövlət Sərhəd Xidməti əməkdaşlarının  Ekologiya və Təbii Sərvətlər Nazirliyinin əməkdaşları ilə birgə həyata keçirdiyi tədbir nəticəsində sərhəd boyu zonada qanunsuz ovla məşğul olan 7 nəfər saxlanılıb. Bu zaman onlardan ov tüfəngləri, bir baş ovlanmış ayı cəmdəyi və iki aylıq diri ayı balası aşkar edilib. Saxlanılan şəxslər barəsində qanuni qərar qəbul edilməsi üçün aidiyyəti hüquq-mühafizə orqanlarına təhvil verilib.Ümumiyyətlə, mənbələrə görə, qədim dövrlərdə bəzi insanlar güclü olmaq üçün nəinki ayı əti, onun iliyini yeyirmişlər. Bəzi dövrlərdə insanlar ayı ətindən geniş istifadə ediblər. Hətta təbabət kitablarında ayı ətinin və piyinin  dərman olduğu, müxtəlif xəstəliklərin yaxşılaşmasına təsir göstərdiyi bildirilir. Təbabətdə ayının piyi əl-ayaqdakı qırıq-çıxıq və burxulmalar olan yerlərə sürtüldüyü, bronxit xəstəliyinin müalicəsində ondan istifadə edildiyi qeyd edilir. Saç tökülməsinə qarşı başa ayı piyi sürtürmüşlər. Revmatizm və bel  ağrılarında da ayı piyindən geniş istifadə olunub. Hazırda da ağırlıqları 40 kiloqramdan 780 kiloqrama qədər olan bu heyvanın ətindən istifadə edənlər var. Ayı ətinin kilosunun 7-8 manata satıldığını iddia edənlər də az deyil. Maraqlıdır, bəs ayı əti nə vaxtsa Azərbaycan mətbəxində yer alıbmı, ayı əti yemək məsləhətlidirmi?Azərbaycan Milli Kulinariya Mərkəzinin (AMKM) baş direktoru Tahir Əmiraslanov texnoloji baxımdan bütün ətlərin yeməli olduğunu dedi: “Azərbaycanda nadir hallarda ayı əti yeyilir. Ayının qaraciyərini çox yemək olmaz. Çünki vitamin zəhərlənməsi baş verə bilər. Qoyun, mal əti ayı ətindən yaxşıdır. Nəyə görə bir tikə ətdən ötrü ayını öldürürlər? Ayı meşələrin bəzəyidir. Həm də bu heyvan növü azalıb. Lap qədimlərdə ayı ovu var idi. O da xüsusi olaraq ayı ovlamağa çıxmırdılar. Başqa heyvan və quşları ovlamaq üçün çıxırdılar. Təsadüfən qarşılarına ayı çıxarsa, onu vururdular. Bundan başqa, ayının balaları kiçik olanda ana ayını vurmaq olmaz. Bizim qədim adətlərimiz var ki, ova o vaxt gedirlər ki, heyvanın balaları böyüyür. Quşları o vaxt vururlar ki, balalarını böyüdüblər və dimdikləri qar görür. İndi hər yer, mağazalar dolu təzə ətdir. Hər gün heyvan kəsilir. Buna görə də gedib ayı ovlayıb ətini yemək lazım deyil. Qurbağa ətini Azərbaycanda yeməyə başlayıblar. Dad  baxımından əti aşpazın bişirməyindən asılıdır. Ayı əti xüsusi bir dad deyil. Ov ətlərinin hər birinin xüsusi bişirilmə qaydası var. Əti yumşaltmaq lazımdır. Ayı ətinin lazımsız bir ət olduğunu düşünürəm. Çalışmaq lazımdır ki, təbiətdə heyvanların sayı öz yerinə gəlsin. Əgər dövlət ayını ovlamağı qadağan edirsə, demək, onu öldürmək lazım deyil. İnsanın qidalana biləcəyi normal ətlər qoyun, mal, balıq, toyuq ətləridir. Qədimlərdə bu ətlər olmadığına görə insanlar ova çıxırdı və bu cür heyvanları ovlayıb bütöv bir qəbilə yeyirdi. Amma yeməli normal ətlər var ki, hər gün təzə-təzə kəsilib satılır”.Dini baxımdan ayı ətinin halal və ya haram olması məsələsinə gəlincə isə dini ekspert Kənan Rövşənoğlu müsəlmanların ayı əti yeməsinin haram olduğunu bildirdi: “Dini mətnlərdə hansı heyvanların ətinin yeyilə biləcəyi, hansının isə qadağan edildiyi qeyd olunub və bunun səbəbləri də geniş şəkildə şərh olunub. İmam Sadiqin (ə) ”Yırtıcı heyvanlardan heç nə yeməyin (yəni onların əti, südü, piyi və s. haramdır” deməsi haqda yazılı mənbələr var. Bundan başqa bir hədisdə “Dovşan əti (sizə) haram edilmişdir. Çünki o pişik kimidir. Pişiyin və digər vəhşi heyvanların pəncəsi kimi onun da pəncəsi var” deyilir. Yəni pəncəsi olması onun ətinin haram olduğuna işarədir. Hədislərdə köpək dişi (yırtıcı heyvanlara məxsus) və pəncəsi olan heyvanların ətinin haram olduğu buyurulur. Ayı da pəncəsi və köpək dişi olan yırtıcı olduğu üçün əti haram edilmiş heyvanlardan sayılır”.(musavat.com)


mənbə : moderator.az



Şərh yazılmayıb.

Şərh yaz.








           
MARAQLI
Maraqlı
- Sitemap - musavat son xeberler Son Xeberler - Son Xəbərlər, yeni musavat, müsavat, musavat qezeti xeberler