Musavat.az
Musavat.az




Müsavat » Xeberler» Xeber

“Aprelin 1-de süfre açıb onu gözledik…” – Şehid esgerin anası

14 Ekim 2016

8:36 pm


15/10/2016 [00:30]: xeber –
Aprel döyüşlərində qəhrəmancasına həlak olan igidlərimizdən biri də şəhid əsgər Şulan Bayramovdu.Biz ənənəvi olaraq sayt olaraq torpaqlarımızın azadlığı uğrunda şirin canından keçən bütün şəhidlərimizin ruhunun qismən də olsa rahatlıq tapması üçün hər dəfə bir şəhid qapısını döyürük.Bu dəfə şəhidin ailəsi ilə görüşüb onunla bağlı xatirələri bölüşmək üçün Sumqayıt şəhərinə yola düşdük. 13-cü  mikrarayonda Şulanı yaxşı tanıyırlar. Biz şəhidin yaşadığı ev 4, mənzil 18 – in qapısını döydük. Bizi şəhidimizin anası Türkanə xanım qarşıladı. Şəhidimizin atası Bayram dayı işdə olduğu üçün onunla görüşə bilmədik. Evə daxil olduq. Evdə bütün şəhidlərimiz kimi Şulanın da ayrıca şəkilləri yerləşdirilib ki, hər gün Şulanın şəkilləri ilə baş – başa qalan Türkanə ana onunla söhbət edir. Türkanə ananı ən gənc şəhid anası da adlandırmaq olar. Cəmi otuz altı yaşı olan Türkanə ana indi şəhid anasıdı. Elə söhbətimizə ilk olaraq şəhidimizin anası ilə başladıq:Türkanə ana:“Dedi ki, əsgərlikdən gələndən sonra oxuyaram…”“Şulan 1996 – cı ildə elə bu evdə anadan olub. İki oğul anasıyam. Şulandan iki yaş kiçik olan ikinci oğlum Turan indi Sərhəd Qoşunlarında hərbi xidmətdədi. Şulan 2014 – cü ildə 33 nömrəli orta məktəbi bitirdikdən sonra Azərbaycan Dəniz Sənayesi Kollecinə qəbul olundu. Sonra qərar çıxdı ki, kollecə daxil olanlar hərbi xidmətə getməlidir. Şulan da hərbi xidmətə yola düşdü. Dedi ki, əsgərlikdən gələndən sonra oxuyaram. 2014 – cü ilin oktyabr ayında hərbi ximətə yola düşdü. İlk olaraq gənc əsgər kimi Gəncə şəhərində xidmət elədi, sonra isə Göygöl rayonunun Toğana kəndində yollandı. Həm Gəncədə olanda, həm də Toğanada olanda atası yanına gedib – gəlirdi. Hər şey yaxşı idi. Bir dəfə də on günlük məzuniyyətə gəlmişdi.“Aprelin 1 – də süfrə açıb Şulanı gözlədik…”Şulan aprelin 1 – də hərbi xidmətini başa vurub evə gəlməli idi. Yanvar ayında ikinci oğlum Turan hərbi xidmətə yola düşdü. Aprelin 1 – də süfrə açıb Şulanı gözlədik. Həmin gün atasının doğum günü idi. Gözlədik gəlmədi… (Ağlayır) Sonra zəng vurub dedi ki, ana, narahat olmayın bizi buraxmadılar, aprelin 3 – də bizi buraxacaqlar. Mən də dedim ki, Şulan, zarafat edirsən? Sən məzuniyyətə gələndə də deməmişdin. O, “surpriz” etməyi xoşlayırdı. Məzuniyyətə gələndə də deməmişdi, qapı döyüldü və açıb gördüm ki, Şulan əsgər formasında qapıda dayanıb. (Ağlayır). Aprelin 2 – dən Şulan döyüşə başlayır. Aprelin 4 – də şəhid olub. Aprelin 6 – da Şulanın cənazəsin gətirdilər. Gözlədik kiçik oğlum da əsgərlikdən Şulana görə evə buraxıldı. Aprelin 7 – də Şulanı Sumqayıtdakı Şəhidlər Xiyabanında dəfn etdik. Şulansız çox çətindi. İyulun 28 – də doğum günü idi, iyirmi yaşını qeyd etdik. Şulandan sonra atası fikirdən xəstəliyə düşdü. Ağır əməliyyat keçirdi. Çox sağ olsun “Unikal” klinikasının rəhbərliyi həyat yoldaşımın əməliyyatını təmənnasız edərək, bütün xərclərini öz üzərlərinə götürdülər”.Şulanın ata nənəsi və babası rəhmətə gedib. Ana nənəsi isə Naxçıvanda yaşayır. Onu nəvə kimi çox istəyən Sədayə nənə qapı qonşudu. Amma bir evli kimidirlər. Necə deyərlər: “Uzaq qohumdan yaxın qonşu yaxşıdı”. Şulanın qonşusu yox, nənəsi olduğunu deyir Sədayə nənə. Şulandan danışdıqca göz yaşı tökür.Sədayə nənə:“Gərək bu adı ona qoymayaydılar…”“Ermənilər bizə dağ çəkdi, bala. Evə gələndə Şulan necə görərdi ki, əlimdə ağır yük var, tez qaçıb əlimdən alıb evə qədər gətirərdi. Onun şəhid olmağını eşidəndə dedim ki, evim yıxıldı, nəvəm hayıf oldu. Mən necə yaşayım, mənim yetmiş yaşım var, sağam, amma Şulan qara torpaqda yatır. Bu mənə çox ağır gəlir. Gərək mən öləydim. (Ağlayır) Bunların üzünə baxa bilmirəm. Onun atası – anası o qədər tərbiyəli adamdılar ki, bizim yanımızda nə uşağın üzündən öpər, nə də qucaqlarına götürürdülər. Çox həya edirdilər bizdən. Şulanın adı onun ata babasının adıdı. Deməli 1933 – cü ildə Şulanın ulu babasıgili imkanlı olduqlarına görə sovet höküməti bütün varını – dövlətini əlindən alır. Həmin il Şulanın babası dünyaya göz açır, yəni atasının atası. Uşağın adını Şulan qoyurlar. Şulan adının mənası “tarımar” – deməkdi. Sonra bu şəhid Şulan dünyaya gələndə onun da adını Şulan qoyudar. Ötən il Şulanın babası Şulan rəhmətə getdi, bu ildə bizim bu nəvə Şulan şəhid oldu. Baba və nəvə belə tarımar oldular. Gərək bu adı ona qoymayaydılar”.Sonda şəhidimizin ailəsinə Allahdan səbr, şəhidimizə isə rəhmət diləyib onlarla sağollaşırıq. Şəhidin həm anası, həm də yaxınları onları yada saldığımıza görə çox sevinirlər. İndi onların ancaq mənəvi dəstəyə ehtiyacı olduqlarını deyirlər.Vasif Əlihüseyn


mənbə : moderator.az



Şərh yazılmayıb.

Şərh yaz.








           
MARAQLI
Maraqlı
- Sitemap - musavat son xeberler Son Xeberler - Son Xəbərlər, yeni musavat, müsavat, musavat qezeti xeberler